Edukira salto egin | Salto egin nabigazioara

2019

Urriaren 31n hasi eta azaroaren 28ra arte, ostegunero elkartuko dira ahozko kultur sorkuntzan zaletutako gazteak. Sarrera doakoa da, baina izena eman behar da aurretik.

Ostegunak bereziak izango dira azaroan. Bai behintzat Ahostegunak egitasmoan izena eman duten 18 eta 22 urte bitarteko gazteentzat. Donostian, UPV/EHUko Gipuzkoako Campusean, elkartuko dira asteko laugarrenean izena eman dutenak, eta ostegunero ahozko kultur sorkuntza bat izango dugu langai eta gozagai.

Saioak 16:00etatik 19:00etara izango dira, UPV/EHUko Gipuzkoako campusaren ondoan dagoen Euskaltzaindiaren egoitzan - Tolare baserria Almortza bidea, 6. Donostia -. Urriaren 31n egingo da lehen saioa, eta, jarraian, ostegunero egingo dira, azkena azaroaren 28an egiten den arte.

Egun horietako bakoitzean diziplina horretan iaioa den lagun bat izango du taldeak tartean; eta azken egunean, guztiak elkartuko dituen mahai-ingurua egingo da:

  • Urriak 31. LITERATURA - Uxue Alberdi
  • Azaroak 7. ANTZERKIA - Miren Gaztañaga
  • Azaroak 14. BERTSOLARITZA - Beñat Gaztelumendi eta Maialen Lujanbio
  • Azaroak 21. KANTAGINTZA - Ines Osinaga
  • Azaroak 28: MAHAI-INGURUA - Aurreko egunetako gonbidatuekin

 

UPV/EHUko Gipuzkoako campusean egingo denez, eta, honenbestez, unibertsitateko ikasleek eskurago izango duten arren, ateak irekita dituzte interesa duten gainerako 18 eta 22 urte bitarteko gazteek ere. Sarrera doakoa da, baina ezinbestekoa izan da aurrez izena ematea webgune honetan egokitutako izen-emate orria beteta. Izen-ematea urriaren 7an hasi eta martxan egon da 21era arte - jada itxita -. Behin izena emanda, saio guztietara etortzeko konpromisoa eskatzen da; saio guztietan talde bera izango da parte hartzen eta dinamikari eusteko garrantzitsua izango da. Izen-emate ordena ere aintzat hartuko da taldea osatzerakoan.

Mintzola Ahozko Lantegiak eta UPV/EHUko Mikel Laboa Katedrak antolatu dugu ekimena, Euskaltzaindiaren eta EHUKulturaren laguntzarekin.

Ahostegunak ekimenaren inguruko informazio gehiago, hemen.