Ahostegunak

Ahots Baten sormen egonaldiak emandako pausoei jarraituta antolatu dugu Ahostegunak. Antzerkia, bertsolaritza, kantua eta literatura: ahozko kultur sorkuntzekin ondo pasatzeko aukera eskaini nahi du egitasmo honek ere, baina, kasu honetan, unibertsitatearen eremuan gauzatzen diren saioen bidez. Ez da unibertsitatean garatu dugun egitasmo bakarra: hortxe baitago, esate baterako, UNIbertsoan egitasmoa ere, bertsolaritza esparru akademikora eramateko helburuz egindakoa.

Aipatutako kultur diziplina horietan murgiltzeko, gozatzeko eta sakontzeko aukera ematea; zale diren gazte horien arteko harreman sareak eragitea; eta diziplinartekotasunaren esperimentazioari espazioa ematea dira ekimenaren helburuak.

UPV/EHUko Gipuzkoako campusean egingo denez, eta, honenbestez, unibertsitateko ikasleek eskurago izango duten arren, ateak irekita dituzte interesa duten gainerako 18 eta 22 urte bitarteko gazteek ere. Izenak ongi adierazten duen moduan, saioak ostegunez dira, arratsaldez. Kultur sorkuntza bat landuko da egun bakoitzean: literatura, antzerkia, bertsolaritza eta kantagintza, eta horietan diziplina horretan aritu edota aditu den lagun batek edo batzuek hartuko du(te) parte. Azken jardunaldian, lau diziplinak aintzat hartuko dituen mahai-ingurua egingo da, eta han elkartuko dira aurrez egun bakoitzean egon diren gonbidatuak.

Mintzola Ahozko Lantegiak eta UPV/EHUko Mikel Laboa Katedrak antolatu dugu ekimena, Euskaltzaindiaren eta EHUKulturaren laguntzarekin.

2019ko udazkenean izango du lehen edizioa.

Antolatzaileak:                                                                        Laguntzaileak: