Itsaso Arrieta Labayru ikastegiko kideak kantuaren garrantzia aldarrikatu nahi izan du bere jardunean, eta gizakiak bere sorreratik musika edo kantuarekin duen loturaren berri eman digu. Bere azalpenean esandakoak: “burua bi hemisferiotan dago banatuta: mentala eta intuitiboa. Oso inportantea da biak elkarrekin egotea. Kantuan gehiago lantzen da alderdi intuitiboa, eta oro har, bizitzan baztertuta uzten dugun hori. Sentimenduak, inpresioak, sentsazioak… adierazten dira musikaren bitartez”, eta gizakiaren irakasbide bihurtzen haurtzarotik bertatik. Horren adierazle dira lo kantuak eta haiek gizakiaren garapenean daukaten eragina. “Haur kantetatik irakasten ari gatzaizkio gure hizkuntza, sentipenak, pultsua, erritmoa… haurrari; oreka bat da, azken baten. Psikomotrizitatea, gorputzaren mugimenduak orekatuak izango dira. Buruaren heldutasuna ere horrekin bat doa. Inportantzia handia daukate, oreka baten hazten ari garelako”. “Gure tradizioan, abiapuntuko bi nota daude (sol eta mi; gero dator la). Bi nota horietan sartzen zaio informazioa, eta horrela iristen zaio haurrari. Euskaraz, benetako sormenak ditugu hori guztia transmititzeko (bi notako kantak, gero hirukoak, gero laukoak). Eta daukagun hori ez dakigu baloratzen”.

Saioari amaiera emateko, Arrietak Benito Lertxundi kantariaren Goizian goizik abestia erabili du maila teorikoan azaldurikoa modu praktikoan ikusteko. Euskal kantutegiko hainbat kanturekin alderatu du, eta euren sinbologian sakondu du (hegaztiak, loreak… emakumea adierazteko erabiltzen dira; emakumearen izate ezberdinak hegazti ezberdinen ezaugarriekin parekatzen dira).

Albistea hedabideetan:

• Labayru Ikastegia