2021/10/13

Ahostegunak: izen-ematea, zabalik!

Ahozko kultur sorkuntzaz gozatzeko eta haien bidez harreman sareak egiteko 18 eta 22 urte bitarteko gazteei zuzendutako saioak dira.

Hirugarrenez, hemen da Ahostegunak. Antzerkian, bertsolaritzan, kantagintzan, literaturan... euskarazko ahozko sorkuntzan ari diren Euskal Herriko gazteak elkartzen dituen ekimena da: elkarren arteko harreman sareak egiteko, diziplinartekotasunean esperimentatzeko, eta, noski, kulturaz gozatzeko.

18 eta 22 urte bitarteko gazteei zuzendutako saioak dira. Lau izango dira aurten: urriaren 28tik azaroaren 18ra ostegunero elkartuko dira gazteak Euskaltzaindiak egoitza duen Tolare baserrian, UPV/EHUko Gipuzkoako campusaren aldamenean. Saioak 16:00etatik 19:00etara izango dira.

Kultur sortzaileak ere gonbidatuko dira aurten, eta parte-hartzaileek izango dute haiekin solasean egiteko aukera. Aletuko ditugu gonbidatuen izenak, baina dagoeneko izen-ematea irekita daukagu: plan proposamena gustuko baduzu, eman izena urriaren 24a baino lehen hemen [izen-ematea itxita].

Euskaltzaindiak, Bertsozale Elkarteak, UPV/EHUko Mikel Laboa Katedrak eta Mintzolak antolatu dugu ekimena aurten.